द्वंद्व

द्वंद्व सुखाशी, उगाच नाही
दुःख उन्हाचे, नभात नाही

विसर पडावा, एवढी तरी,
तुझी नि माझी ओळख नाही

असे जर साथ निलकंठाची
समुद्रमंथन, असाध्य नाही

कितिक आळवू, मेघमल्हार...
नशीब माझे, बरसत नाही

येत जा अशी तू अधून मधून
तेवढाच मी, निःशब्द नाही

-- पादाकुलक वृत्त - (गझल )

अभिजित गलगलीकर
०७-०१-२०१४

तिचा अजुनही नकार आहे

तिचा अजुनही नकार आहे
अशी नशिबात बहार आहे

जरा अतर्क्य, निघावा अर्थ
असली कविता , तयार आहे

भेटता यावे तुजला म्हणून
शोधले नवे भुयार आहे

वेळीच तुला सावध करावे
यास्तव करतो प्रचार आहे

थकले जिणे टेकवायला
अंथरलेली पथार आहे

वास्तवास रे घाबरतो 'अभि'
सवे ठेवतो कट्यार आहे

वृत्त - पादाकुलक

-- अभिजित गलगलीकर - ०९-०८-२०१३